NLEX pasok sa semis

Laro sa Martes
(Trinity University of Asia Gym)
2:00 p.m. Big Chill vs Boracay
4:00 p.m. RnW vs Cebuana

Tuluyan ng umabante ang NLEX Road Warriors sa semi-finals ng PBA D-League Foundation Cup matapos gapiin ang Erase Placenta, 85-76, nitong Huwebes sa Ynares Sports Arena sa Pasig City.

Sinalba ng clutch three-pointer ni Cliff Hodge sa huling 38 seconds ng laro ang Warriors,

 nanganganib makalasap ng unang pagkatalo, sa matinding pagbabalik ng Erasers na humabol mula sa 24 points na agwat sa fourth period.

Nagawa pang makalamang ng Erasers, 74-76, buhat sa lay-up ni Macky Acosta may 2:07 natitira sa fourth nang biglang magpasabog ng 8-0 bomba ang Warriors at agawin muli ang abante sa 82-74 para selyuhan ang unang tiket sa semis.

Kumubra si Hodge ng team-high 18 points habang tumulong naman ang mga Atenistang sina Kirk Long, at Ford Arao na nagtala ng tig-15 points samantalang si Eman Monfort ay nagtipa ng walong assists para sa Road Warriors na patuloy ang malinis na record at hangad ang ikatlong sunod na championship sa liga.

“Erase did a good job coming back. We were ready for their press but did not execute our press break well enough. But a win is still a win so we’ll take it,” pahayag ni NLEX coach Boyet Fernandez.

Bagama’t napagtagumpayan ng NLEX ang laban, naramdaman ng Warriors ang hindi paglalaro nila Calvin Abueva at Ian Sanggalang sa kanilang ikalawang sunod na laro lalo na sa huling yugto.

Patuloy pa ring nasa United States sina Abueva at Sanggalang kasama ang team ng San Sebastian para paghandaan ang susunod na season ng NCAA.

Sa kabilang banda, nanguna si Allan Mangahas para sa Erase Placenta na gumawa ng 19 points.

Allan Mangahas led all scorers with 19 points. He also had 11 rebounds as Erase Plancenta, surprisingly, outrebounded NLEX, 50-42. (John Alfrick C. Cruz)

Texters, humihinga pa

Anuman ang mangyari sa Game Three ng finals, nananatiling buhay pa sa serye ang tropa ni coach Chot Reyes.

Umaasa si Reyes na makababalik pa sa laro ang Texters lalo na kung magigising ang dalawang key players ng koponan, sina Ranidel De Ocampo at two-time PBA co-finals MVP Jimmy Alapag.

“They’re completely absent. We’re not going to beat this team (B-Meg) unless Jimmy and Ranidel come back from vacation,” sabi ni Reyes. “They’ve taken their early vacation.”

“We can beat them with a full roster, not with a depleted lineup,” dagdag ni Reyes.

Kung sakaling manaig ang Texters kontra B-Meg, tabla na ang kanilang bakbakan sa best-of-seven titular showdown. At kung pumanig sa Llamados ang tagumpay, angat na sila sa mabigat na 3-1 agwat.

Hindi naman nangangamba si Reyes kung ganoon ang magiging sitwasyon ng Texters.

Dalawang do-or-die games ang napagtagumpayan ng Texters kontra sa matitikas na Barako Bull Energy sa semis at gayundin noong nakalipas na Philippine Cup na tinalo nila ang Petron Blaze Boosters matapos nalugmok sa 1-3.

Aminado si B-Meg tactician Tim Cone na hindi nila minamaliit ang Texters.

“They can come back anytime. They can beat us if they like,” pahayag ni Cone, pagkatapos mamayani ng B-Meg sa dikdikang Game Two na nagtapos sa iskor na 91-87. 

Samantala, siguradong ang 22-anyos B-Meg import na si Denzel Bowles na ang mag-uuwi ng Best Import award sa PBA dahil sa taglay nitong averages na 25.65 points, 11.95 rebounds, 3.10 assists, at 1.75 blocks, malayong-malayo kay Texters Donnel Harvey na may 20.64 points, 16.07 rebounds, at 1.14 blocks sa 14 games na nilaro kumpara sa 20 games ni Bowles.

Dikit naman ang bakbakan sa Best Player of the Conference Award sa pagitan nila Gary David ng Powerade, Mark Caguioa ng Barangay Ginebra, Marcio Lassiter ng Petron, Cyrus Baguio at L.A. Tenorio ng Alaska. (John Alfrick C. Cruz)

Beermen nalo sa Cobras

Muling nagpakita ng lakas ang San Miguel Beermen nang pataobin ang dehadong Bangkok Cobras, 91-77, sa pagpapatuloy ng Asean Basketball League elimination round nitong Sabado sa Ynares Sports Arena, Pasig City.

Bumida ang dating PBA import na si Nick Fazekas na naglista ng game-high 25 points kasunod si Chris Banchero na may 22 points at si Leo Avenido ay nag-ambag ng 13 points para sa ika-16^th panalo ng Beermen.

Mainit na binuksan ng Cobras ang sagupaan ng magpakawala ng tatlong three point shots si Jai Reyes sa unang quarter at lamangan ng apat ang Beermen, 22-18, hanggang sa rumatsada ang bataan ni San Miguel coach Bobby Parks sa pangunguna ni Fazekas sa pagtatapos ng first half, 44-38. 

Huling nakatikim ng abante ang Cobras buhat sa three point shot ni Ratdech Kruatiwa sa kalagitnaan ng sa third period at hindi rin nagtagal dahil biglang umalagwa ang Beermen bunsod sa magkakasunod na baskets nila Fazekas, at Banchero.

Nagpatuloy sa pag-arangkada ang Beermen sa huling yugto at tuluyang sinaraduhan ng pag-asa ang Cobras na lumalasap ng kanilang ika-apat na sunod na pagkatalo sa torneo at naselyuhan ng hook shot ni Fazekas, may isang minuto ang natitira.

Kumana si Gentry Lewis, Marvin Cruz, at Jai Reyes ng tig-20, 16, 14, ayon sa pagkakasunod, para sa Cobras na nagtala lamang ng 22 points sa shaded lane kontra sa 42 points ng Beermen.

Susunod na haharapin ng Beermen ang Saigon Heat sa Mayo 9 sa Tan Binh Stadium. (John Alfrick C. Cruz)

Iskor:

Beermen 91 – Fazekas 25, Banchero 22, Avenido 13, Crews 12, Yap 8, Baguion 5, Fajardo 3, Gonzales 3.

Cobras 77 – Lewis 20, Cruz 16, Reyes 14, Kruatiwa 11, George 8, Apiromvilaichai 4, Chaiwat 2, Limsuwan 2.

De Ocampo, Alapag missing-in-action

Usap-usapan pa rin ang hindi pagpaparamdam ni Texters Ranidel De Ocampo at two-time PBA Finals MVP Jimmy Alapag sa best-of-seven series ng titular showdown.

Tatlong laro na ang pinag-agawan ng Talk ‘N Text Tropang Texters at B-Meg Llamados ngunit walang De Ocampo at Alapag ang nakapaglista ng malalaking numero para kay coach Chot Reyes kumpara sa mga nakalipas na championship series.

 

Aminado si Reyes na wala silang pag-asang magtagumpay na makamit ang inaasam-asam na back-to-back championship hangga’t hindi bumabalik ang laro nila De Ocampo at Alapag.

“We’re not going to beat B-Meg unless Ranidel de Ocampo and Jimmy Alapag are back from a vacation,” pahayag ni Reyes pagkatapos ng kanilang huling kabiguan sa Game Three.

 “Josh Urbiztondo has been abusing Alapag and Marc Pingris was beating De Ocampo. There’s too much load on Ryan Reyes, Kelly Williams and Donnel Harvey. We’ve been completely outplayed by our B-MEG counterparts, that’s the difference,” dagdag ni Reyes.

Isang puntos lang ang ginawa ni De Ocampo sa Game Three samantalang nagtipa naman si Alapag ng anim na puntos sa 2-of-13 field goal shooting na naglagay sa apat at pitong puntos na average sa serye, ayon sa pagkakasunod,

 “It’s over if Jimmy and Ranidel don’t come around. We can’t beat B-MEG without our complete roster,” sabi pa ni Reyes. (John Alfrick C. Cruz)

Llamados, lumapit sa korona

aro Ngayon
(Smart-Araneta Coliseum)
6 p.m. TNT vs B-Meg

Kung nagkamali sa kanilang decision making sina Denzel Bowles at James Yap sa Game Two, agad naman silang rumesponde at pinatunayan ang kalibre sa pangatlong sagupaan.

Inangkin ng B-Meg Llamados ang 2-1 bentahe sa Game Three ng 2012 PBA Commissioner’s Cup Finals matapos bawian ang Talk ‘N Text Tropang Texters, 91-87, nitong Biyernes sa Smart-Araneta Coliseum. 

Muling maghaharap ang dalawang koponan para sa Game Four ng kanilang sagupaan sa best-of-seven finals ngayon  alas-6:00 ng gabi sa Smart-Araneta Coliseum.

Dikdikan ang naging tagpo sa first half ng Game Three hanggang sa makatikim ng pinakamalaking kalamangan ang B-Meg sa huling tatlong minuto ng third period buhat sa three-point shot ni Josh Urbiztondo, 59-52, na hindi rin naman nagtagal dahil agad na bumuwelta ng magkasunod na baskets si Ryan Reyes at binigyan ang Texters ng dalawang agwat sa pagtatapos ng quarter, 64-62.

Huling nakatabla ang Texters sa 77-all at hindi na nakalapit pa ng magmintis ng sunod-sunod na tirada kabilang ang split charities ni import Donnel Harvey may 1:03 natitira. 

Tuluyan ng sinelyuhan ng B-Meg ang ikalawa nilang panalo sa best-of-seven finals series bunsod sa apat na magkakasunod na free-throws na isinalpak ng 22-anyos na si Bowles, sa 23.1 at 16.8 segundo ng fourth period.

Pinagharian ni B-Meg importBowles ang ratsada ng Llamados nang magtipa ito ng 28 points, 13 rebounds at anim na blocks. 

“I made some big mistakes in Game Two and I wanna make up,” sabi ni Bowles.

Tumulong si Yap na may 21 points habang gumawa naman ng tig-12 points sina Urbiztondo at PJ Simon.

Pareho namang nagtala ng tig-21 points sina Harvey at Reyes para sa Texters. (John Alfrick C. Cruz)

Iskor: (Game Three)

B-Meg 91 – Bowles 28, Yap 21, Urbiztondo 12, Simon 12, Intal 5, Barroca 4, Reavis 4, Pingris 2, De Ocampo Y. 2, Devance 1.

Talk ‘N Text 87 – Harvey 21, Reyes 21, Peek 15, Castro 11, Fonacier 7, Alapag 6, Williams 5, De Ocampo R. 1, Gamalinda 0, Dillinger 0.

 

Import ng B-Meg, tinukoy

Bagama’t kasalukuyan pa ring lumalaban ang B-Meg Llamados sa titulo ng 2012 PBA Commissioner’s Cup finals, tiniyak na agad ni coach Tim Cone ang kanilang magiging import sa susunod na conference.

Ipaparada ng B-Meg ang bagong-saltang import na si Marqus Blakely na naglaro sa huling training camp ng Houston Rockets at kilalang beterano ng NBA D-League.

Isiniwalat pa ni Cone na diumano ay dalawang Marc Pingris ang katumbas ni Blakely, nagwagi ng NCAA Slam Dunk contest para sa University of Vermont.

“He’s a true power forward. He’s 6’5, but he plays like he’s 6’8, 6’9,” wika ni Cone.

Si Blakely ay huling ikinampanya ang Sioux Falls Skyforce sa NBADL nag-average ng 16.1 points, pitong rebounds, tatlong assists, dalawang steals, at isang block sa 18 games bago nalipat sa Iowa Energy kung saan gumawa siya ng 13.4 points, limang rebounds sa walong laro. (John Alfrick C. Cruz)