Lassiter sa Petron

Simula sa susunod na season, maglalaro na si Marcio Lassiter para sa Petron Blaze Boosters.

Isang five-man deal ang inaprubahan ng PBA para isakatuparan ang pormal na paglipat ni Lassiter, fourth-overall pick last year, mula sa Powerade Tigers patungo sa Petron Blaze Boosters.

Sa isang text message na ipinadala ni PBA media bureau chief Willie Marcial, kinumpirma niya ang pagsang-ayon ng management sa transaction.

Kasama si Lassiter, nangunguna sa karera ng Rookie of the Year award, maglalaro na rin bilang Blaze Booster ang beteranong guwardiya na si Celino Cruz habang ipagpapatuloy naman nila Rabeh Al-Hussaini, Rey Guevarra at Lordy Tugade ang kanilang basketball career sa Powerade Tigers.

Noong Pebrero isa ring trade proposal ang inihain na magdadala sana kay Lassiter sa Petron kapalit ni Noy Baclao at Guevarra, na agad namang ibinasura ng PBA dahil hindi daw patas ang deal na gusto nilang mangyari ayon kay Commissioner Chito Salud.

At sa revised trade na inaprubahan, sinabi ni Salud na, “The terms of the revised trade are hereby approved. There is acceptable parity in the cumulative skills, value, use and potential the players from each side of the trade will bring to their respective teams.”

Naglista si Lassiter, tinulungan ang Tigers na makarating sa Philippine Cup finals, ng average 17.7 points, 5.9 rebounds, 3.6 assists, 1.3 steals, and 0.9 blocks sa sampung laro ng Commissioner’s Cup para sa Tigers, samantala, si Cruz, nakapaglaro na rin para sa Shell, Red Bull, Burger King, Purefoods, at Ginebra ay may 0.89 points at 1.22 rebounds lamang sa average na walong minuto kada laro.  

Si Guevarra, third over-all pick nang nakalipas na draft, ay may average na 5.0 points, 2.0 rebounds at 0.6 assists sa 16.4 minutes na paglalaro para sa Petron habang si Al-Hussaini, 2010 Rookie of the Year awardee at kababalik lang mula sa ACL injury, ay nagtala lamang ng 1.75 points at 1.25 rebounds. Ang 34-anyos na si Tugade naman ay may 2.13 points, 1.25 rebounds at 0.38 assist   

“We are very happy with this trade. We are getting a much-needed big man in Rabeh Al-Hussaini and getting two proven shooters and scorers in Guevarra and Tugade,” pahayag ni Powerade executive Ronnie Asuncion.(John Alfrick C. Cruz)