Bagama’t iniinda pa rin ni Mark Caguioa ng Barangay
Ginebra Kings ang natamong injury noong Marso 30 sa kanilang play-off kontra
B-Meg Llamados, garantisadong may posibilidad pa rin na makuha niya ang PBA
Best Player of the Conference award.
Bago pa man magsimula ang Commissioner’s Cup
semifinals, pumangalawa na si Caguioa kay Gary David ng Powerade sa statistical
race.
Hawak ni David ang unang pwesto na may 34.5 average
kada laro samantalang may 31.5 lamang si Caguioa.
Hindi naman malayo ang agwat ni Caguioa kay Marcio
Lassiter ng Powerade na pumangatlo, tangan ang 30.3 average, kasunod sina Cyrus
Baguio (29.1) at LA Tenorio (29.0) ng Alaska, at kinumpleto ni Arwind Santos ng
Petron (28.9).
Malaki ang tsansang mapasakamay ni Caguioa ang
parangal dahil maliban sa iba, ang kanyang koponan na lamang ang natitirang
naglalaro sa semis.
Iyon ay maisasakatuparan kung siya ay makababalik sa
laro at matutulungang makapuwesto ang Gin Kings sa Finals.
Matatandaan na hindi nakapaglaro si Caguioa noong
game one nang pataobin ang Ginebra ng B-Meg, 67-82, sa Ynares Center Antipolo.
Samantala, nahulog naman sa
listahan si Macmac Cardona ng Meralco Bolts, mula sa ikalawa patungo sa
ika-siyam na posisyon, habang may pag-asa namang makabunot ng puwesto sa top
five sina Jimmy Alapag, Ranidel De Ocampo, Jarred Dillinger, Jason Castro ng
Talk n’ Text at Willie Miller ng Barako Bull. (John Alfrick C. Cruz)
No comments:
Post a Comment