Sinamantala ng B-Meg Llamados ang hindi paglalaro ni
Mark Caguioa nang pataobin nito ang number 2 Barangay Ginebra Kings, 82-67, sa
game one ng kanilang 2012 PBA Commisioner’s Cup best-of-five semifinal series
sa Ynares Center Antipolo.
Walang spark na uminit sa Gin Kings dahil nagtamo ng
orbital stress fracture sa kanang pisngi si Mark Caguioa matapos bumagsak sa
sahig sa kanilang playoff match noong Marso 30 sa Cuneta Astrodome.
Hindi na inaasahang makalalaro pa si Caguioa sa
serye dahil napakanlulumo ang natamo nitong injury.
Samantala, pinangunahan ni import Denzel Bowles ang
ratsada ng B-Meg ng magpakawala ito ng 21 points, humakot ng 10 rebounds at
dalawang assists, kasama na ang dalawang impresibong dunk na nagpatayo sa
mahigit sampung-libong manonood sa second half.
Mabilis na umarangkada ang Gin Kings noong unang
yugto nang magpasabog ito ng sunod-sunod na lay-up pati na ang isang pagsalpak
ng bola sa ring ni Jackson Vroman, may 9:25 ang nalalabi. Natapos ang 1st
quarter sa iskor na 21-8, pabor sa Ginebra.
Agad-agad namang naremedyohan ng B-Meg ang kanilang
maasim na laro nang magpasiklab ito ng dalawang 6-0 blast, matapos ang lay-up
ni Vroman sa pagsisimula pa lamang ng 2nd quarter, at agawin ang
bentahe sa Gin Kings sa iskor na 33-29.
Lalong tumindi ang bakbakan nang matawagan si Marc
Pingris ng kanyang flagrant foul nang suwagin niya sa likod si Enrico
Villanueva, 8:43 natitira sa 2nd quarter
Hindi na lumingon sa likod ang mga bata ni Tim Cone
nang magpaulan ito ng dikit-dikit na three point shots sa kalagitnaan ng third
quarter mula kay James Yap, Joe Devance, na parehong may tig siyam na puntos at
Josh Urbiztondo na naglista ng anim.
Tumulong din si PJ Simon ng 13 points na bumitaw ng
isang three point play habang si Yancy De Ocampo, na nambwisit kay Vroman sa
pagsisimula pa lamang ng 4th quarter kung kaya’t natawagan ito ng
flagrant foul penalty one, ay nagdagdag ng siyam na puntos para sa B-Meg.
“The boys really played hard, went with our system, and never relaxed. We’re able to execute our game-plan and more ready to the physicality of the game.” Cone said.
Dalawa lamang sa Gin Kings ang umabot sa double
figures, si Vroman at Robert Labagala na parehong may tig sampung puntos.
Bukas naman ay inaasahan ang isa pang matinding laro
sa game two ng semifinals sa pagitan ng Barako Energy Boosters at Talk N’ Text
Tropang Texters. Hawak ng Energy ang bentahe, 1-0, sa kanilang pagtatagpo sa
6:45 ng gabi sa pareho pa ring venue. (John Alfrick C. Cruz)
No comments:
Post a Comment